陳泗記係我心目中大排檔Blue Blood之一。係中環黃金地段，難得仲有得坐街邊嘆小炒晚飯，而且一D都唔失禮。係夜中環既另一風味天堂樂土。
五六十蚊一個小菜，堅持用新鮮料，雪藏野免問。除了我呢D庶民長期幫襯，有不少身光頸靚富貴人家自攜靚酒光臨同老細一齊分享，亦有唔少有錢人叫工人/司機前來外賣。如此生意晚晚爆棚，要等枱一D唔出奇。
番書仔羊咩鬚老細愛一邊隊啤酒，一邊食煙仔，一邊慢慢用心炒餸，天王吹佢D快手都話知你架，性格亦豪爽率直帶點火爆，同佢炒食物一樣夠曬鑊氣！
佢地夫妻檔日做十幾個鐘，不時爆粗吵架，好快又溫馨恩愛，街坊食客老早已經習慣佢地既相處方式，同食物味道一樣夠重口味。
龍小姐必點既小炒之中，其中有兩道：蜆介炒牛肉 - 我愛口口牛肉都有入味既鮮濃蜆介汁，索汁既蔥亦係精華。枝竹豆卜排骨煲 - 滾騰騰煲上汁勁滾，枝竹豆卜索曬豬肉味，排骨肉亦好滑好有鮮味，我可以食多2碗白飯。樂也！
陳泗記星期日例休的，記得唔好去摸門釘啊！(陳泗記：中環士丹利街74號 電話：2545-2834)
