08-03-2014 龍小姐第一次的烤全羊@中發源清真餐廳

龍小姐嫁後都冇時間北上，但大少要我一齊上深圳出席公司飯局。即使遇上不用開班/出席活動+想在家休息的寶貴一個星期六，我只好乖乖做跟得夫人奉陪啦！大少有咩要帶埋我去試呢? 原來BOOK了一圍金牌烤羊餐。噢，羊羊怪的我，流口水了。

飯局地點係中發源清真餐廳 (羅湖火車站區春風路2012號春風萬佳東側斜對面)，過了羅湖關口後打的約15分鐘內的路程可到達。說好的七時到達二樓的VIP房，裝修及地方看來尚算可以啦。

全羊宴套餐最少一天前預早訂，因為烤全羊需時。11人都齊了，女侍應進來，大伙兒叻唔切講港式煲冬瓜，但女侍應用白話問：可以上菜未? 全房人出咗醜都未笑完，主角烤全羊出場上桌！

烤全羊由頸至尾上，看似乳豬啊！

先用刀叉界開烤羊

烤全羊用的是羊BB，但係羊仔羊女就唔知，因找不到特徵(例如：羊B仔Or羊歡喜)，而且羊雜都成為全羊宴套餐中的羊雜湯及羊雜粉了。界開烤羊後，各人帶手套去手撕羊肉啦！

烤羊皮薄香脆，羊肉嫩滑有肉汁，沒有烤到乾巴巴及唔太騷味。

再點埋附上的黃薑粉孜然香草粉，大口滋味食，幸好肥羔好少，正啊！

半個鐘後的烤全羊，都俾我地幾乎清曬。

羊雜湯清甜冇羊騷，飲完好暖身！共飲咗2碗。

羊雜菜湯粉既濃郁雜菜湯底，係金牌烤羊餐中的另一驚喜。又食了2碗。

香辣羊肉烤餅，係大少既至愛之一，佢食了2個！

另外都點咗一D大路小菜，酒水同甜品，水準OK。

好彩男士多，剛剛好食曬。呢D貨式，埋單平均每人170人仔，唔貴，但有D國內人說係中價。龍小姐第一次食烤全羊，總結係感覺良好。

唔知仲有冇其他餐廳既烤全羊再正宗D既呢? 唔知大家有冇其他心水烤全羊店? 歡迎告知，因為多試無妨啊。